ಇಕ್ಕುವವನೆಂದಿಗೊಂ | ದೊಕ್ಕಲೆಂದನಬೇಡ |
ಇಕ್ಕಿ ಎರೆವನು ಇಲ್ಲಿರದೆ ಸ್ವರ್ಗಕೆ |
ಒಕ್ಕಲಿರಹೋಹ ಸರ್ವಜ್ಞ
ಭಂಡಾರ ತುಂಬಿನೀ ಭಂಡಿಯಲಿ ಹೇರುವರೆ |
ಮಂಡಲವನಾಳಿ ಮೆರೆವರೆ ಒಕ್ಕಲನು |
ಕೊಂಡಾಡಬೇಕು! ಸರ್ವಜ್ಞ
ಬೆಕ್ಕು ಮನೊಯೊಳು ಲೇಸು ಮುಕ್ಕು ಕಲ್ಲಿಗೆ ಲೇಸು|
ನಕ್ಕು ನಗಿಸುವಾ ನುಡಿ ಲೇಸು ಊರಿಗೆ|
ಒಕ್ಕಲಿಗ ಲೇಸು ಸರ್ವಜ್ಞ
ಒಕ್ಕಲಿಲ್ಲದ ಊರು ಮಕ್ಕಳಿಲ್ಲದ ಮನೆಯು|
ಲೆಕ್ಕವಿಲ್ಲದವನ ಬೇಹಾರ ಇವು ಮೂರು|
ದುಕ್ಕ ಕಾಣಯ್ಯ ಸರ್ವಜ್ಞ
ಒಕ್ಕಲನು ನಲುಗಿಸದೆ ಲೆಕ್ಕವನು ಸಿಕ್ಕಿಸದೆ |
ಕಕ್ಕುಲತೆಯಿಂದ ನಡಿಸುವಾ ಅರಸನು |
ಚಕ್ಕಂದವಿರುವ ಸರ್ವಜ್ಞ
ಒಕ್ಕಲಿಗೆ ಊರಾಸೆ ಮಕ್ಕಳಿಗೆ ಮನೆಯಾಸೆ|
ಜಕ್ಕವಕ್ಕಿಗೆ ಕೊಳದಾಸೆ, ಸೂಳೆಗೆ|
ರೊಕ್ಕದಾ ಆಸೆ ಸರ್ವಜ್ಞ
ಅಕ್ಕರವ ಕಲಿತಾತ ಒಕ್ಕಲನು ತಿನಗಲಿತ|
ಲೆಕ್ಕವ ಕಲಿತ ಕರಣಿಕನು ನರಕದಲಿ|
ಹೊಕ್ಕಾಡಕಲಿತ! ಸರ್ವಜ್ಞ
ಒಕ್ಕಲಿಗನೋದಲ್ಲ ಬೆಕ್ಕು ಹೆಬ್ಬುಲಿಯಲ್ಲ|
ಎಕ್ಕೆಯ ಗಿಡವು ಬನವಲ್ಲ, ಇವು ಮೂರು-|
ಲೆಕ್ಕದೊಳಗಲ್ಲ; ಸರ್ವಜ್ಞ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ