ಬಸವರಾಜದೇವರರಗಳೆ - ಹನ್ನೊಂದನೆಯ ಸ್ಥಲ

ಬಸವರಾಜದೇವರ ರಗಳೆ 

ಹನ್ನೊಂದನೆಯ ಸ್ಥಲ 

ಬಸವನ ಭಕ್ತಿಯಂ ಬಸವರಾಜನ ದಾನವಿನೋದವೃತ್ತಿಯಂ 

ಬಸವನ ನಿಷ್ಠೆಯಂ ಬಸವದೇವನ ಸನ್ನುತಪುಣ್ಯಕೀರ್ತಿಯಂ | 

ಬಸವನ ಪೆರ್ಮೆಯಂ ನಲಿದು ಕೇಳುತೆ ಕಿನ್ನರಬೊಮ್ಮ ತಂದೆಗಳ್ 

ಬಸವನಿರೀಕ್ಷಣಾರ್ಥದೊಲವಿಂ ಬರುತಿರ್ದರನೂನಸಾತ್ವಿಕರ್ || ೧* 

೦. 

ಇಂತು ಬಸವಣ್ಣನಂ ನೋಡುವುದ್ಯೋಗದಿಂ 

ಸಂತಸದಿ ಬರುತಿರ್ದರಂತಲ್ಲಿ ಬೇಗದಿಂ | 

ಎಸೆವ ಕಿನ್ನರಬೊಮ್ಮ ತಂದೆಗಳು ಬರುತಮಿರೆ 

ಅಸಮನಯನನ ಗಣಾವಳಿ ನೋಡಿ ನಲಿವುತಿರೆ | 

ಮುಂತೆ ವೃಷಭಧ್ವಜಂ ಗಗನದೊಳು ಕುಣಿವುತಿರೆ 

ಪಿಂತೆ ಮಾಹೇಶ್ವರರ ಹೇಳಿಕೆಗಳೊಪ್ಪುತಿರೆ | 

ನಡೆತಂದು ಪದವೀಥಿಯಂ ಪುಗುತ್ತಿರಲತ್ತ 

ಕಡುನೇಹಿ ಬಸವಂಗೆ ಬಲದ ಕಣ್ ಕೆತ್ತುತ್ತ-| 

ವಿಮ್ಮಡಿಸಿ ಪುಳಕಂಗಳೊಮ್ಮೆಗೊಮ್ಮೆಗೆ ನೆಗೆಯೆ 

ನೂರ್ಮಡಿಸಿ ಮೈವೆಚ್ಚು ತಾನಂದವಂದೊಗೆಯೆ | ೧೦ 

ಪರಮ ಹರುಷಂದೋಱುತಿರೆ ಸಂತಸಂಬಡುತೆ 

ಹರನ ಭಕ್ತರ್ ಬರ್ಪರಿಂದೆನ್ನ ಮನೆಗೆನುತೆ | 

ಶಶಿಯ ಬರವಂ ಚಕೋರಂ ಬಯಸಿ ನಿಂದಂತೆ 

ಎಸೆವ *ಕಾರಂ ಬಯಸಿನಿಂದ* ಚಾದಗೆಯಂತೆ |

(* ಮುಂಗಾರಂ ಬಯಸುವ (ಕ.ಖ.)) 

ಮುಂದೆ ಮಿಗೆ ಮೆರೆವ ನಂದಿಯ ಪತಾಕೆಯ ನಡುವೆ 

ಸಂದಣಿಪ ಗಣನಾಯಕರ ಸಂಭ್ರಮದ ನಡುವೆ | 

ಕಿನ್ನರಯ್ಯಂ ಬರುತ್ತಿರೆ ದೂರದಿಂ ಕಂಡು 

ತನ್ನ ಮನದೊಳಗೆ ಗುಡಿಗಟ್ಟಿ ಹರುಷಂಗೊಂಡು | 

ಬಸವನಿದಿರ್ಗೊಂಡು ಭಯಭಕ್ತಿಯಿಂ ಮೈಯಿಕ್ಕಿ 

ಒಸೆದು ಕಿನ್ನರತಂದೆಗಿದಿರಾಗಿ ಮೈಯಿಕ್ಕಿ | ೨೦ 

ಇರ್ಬರೊಂದಾಗಿ ನಲಿನಲಿದು ತಕ್ಕೈಸುತಂ 

ಸರ್ಬನ ಗಣಂಗಳೊಳು ಪರಮಸುಖವೊಂದುತಂ | 

ಬಂದು ಬಸವಣ್ಣನರಮನೆಯನೊಲವಿಂ ಪೊಕ್ಕು 

ತಂದುನ್ನ ತಾಸನದೊಳಿರಿಸುತೆ ಮನಂ ಮಿಕ್ಕು | 

ಪಾದಂಗಳಂ ತೊಳೆದು ತೀರ್ಥಜಲಮಂ ತಳೆದು 

ಆದರಂ ಮಿಗೆ ಕಿಂಕರಾಕಾರದೊಳು ನೆರೆದು| 

ಪನ್ನೆರಡು ಸಾವಿರೊಡೆಯರ ನಡುವೆಯಾಡುತಂ 

ಕಿನ್ನರಯ್ಯಂಗೆ ಲಿಂಗಾರ್ಚನೆಗೆ ನೀಡುತಂ | 

ಸಂಗಂಗೆ ಸಂಗಡದೊಳಾರೈಸಲಿಕ್ಕುತಂ ಹಿಂಗದೆ 

ಶಿವಪ್ರಸಾದಂಗಳಿಂ ಪೆಚ್ಚುತಂ | ೩೦ 

ಕಿನ್ನರಯ್ಯಂಗೆ ಆದರದಿಂದೆ ಉಡಲಿತ್ತು 

ಮನ್ನಿಸುತ್ತವರ ಪದಮಂ ನೆತ್ತಿಯೊಳು ಹೊತ್ತು | 

ಕಿನ್ನರಯ್ಯನ ಹರುಷವೇ ಹರುಷವಾಗುತಂ 

ಕಿನ್ನರಯ್ಯನ *ನೇಹವೇ* ನೇಹವಾಗುತಂ | 

(* ಸರಸ.) 

ನಲಿನಲಿದು ಕೆಲದೆವಸವೀ ತೆಱದೊಳೊಪ್ಪುತಿರೆ 

ಒಲವು ದಳವೇಱಿ ಇರ್ಬರ ನಡುವೆ ಬೆಳೆವುತಿರೆ | 

ಒಂದು ದೆವಸಂ ಕಿನ್ನರಯ್ಯಂಗಳೊಲುಮೆಯಿಂ 

ಇಂದುಧರನಾರೋಗಣೆಗೆ ಚಿತ್ತದರ್ತಿಯಿಂ| 

ತನ್ನ ಸೊಗಸೇ ಶಿವಂಗತಿಸೊಗಸು ತಾನೆಂದು 

ಚೆನ್ನವಪ್ಪುಳ್ಳಿಗಳ ಮೇಲೋಗರಕ್ಕೆಂದು | ೪೦ 

ತರಿಸಿ ಸುಖಮುಖದಿಂದ ಸೋದಿಸುತ್ತಿರ್ದಲ್ಲಿ 

ಶರಣರೊಡಗೂಡಿ ಮಿಗೆ ಬಣ್ಣಿಸುತ್ತಿರ್ಪಲ್ಲಿ | 

ಹೆಂಪಿಂದೆ ಶರಣರ ನಡುವೆ ಉಳ್ಳಿ ಮೆಱವುತಿರೆ 

ಕಂಪು ಬಸವನ ನಾಸಿಕಕ್ಕೆ ತೀಡುತ್ತಮಿರೆ | 

ತಂದರಾರೀಯಭೋಜ್ಯವನೆನುತ್ತುಳ್ಳಿಯಂ 

ನಿಂದಿಸುತೆ ಪೋದನರಮನೆಗೆ ಅಭವಪ್ರಿಯಂ | 

ಆ ನುಡಿಯನಾಲಿಸುತೆ ಕಿನ್ನರಯ್ಯಂಗಳಿರೆ

ಏನೆಂದ ಬಸವಣ್ಣನೆನುತೆ ಕಾಯ್ಪಿಡಿದಡರೆ|

ಕಂಗಳರೆಕೆಂಪಾಗೆ ಮೀಸೆಗಳು ಕೆತ್ತುತ್ತೆ 

ಹಿಂಗದಿರ್ಪುದು ತನ್ನ ಮಂದಿರದೊಳಗೆ ಮತ್ತೆ | ೫೦ 

ಹರಹರ ಇದೇನೆಂದು ಕಣ್ಣ ನೀರಿಕ್ಕುತಂ 

ಪಿರಿದುಂ ನಿರೋಧದಿಂ ಶರಣಸತಿ ನೋವುತಂ | 

ಬರಲಾಗದಿಲ್ಲಿಗಾಂ ಬಂದಲ್ಲಿ ಸೈರಿಪುದು 

ಶರಣರಂ ದೂರದಿಂ ಕೇಳುತಾದರಿಸುವುದು | 

ಅಮೃತಮಂ ಬಿಸುಟು ಮಲ್ಲಯ್ಯನಾರೋಗಿಸುವ 

ಅಮೃತಮಯಶಾಕಮನಿದಂ ನೋಡಿ ನಿಂದಿಸುವ | 

ನುಡಿಗೇಳ್ದು ನಿಲಲಾಗದೆಂದು ಘುಡುಘುಡಿಸುತಂ 

ಕಡುಕೋಪದಿಂದೆ ಪೋಱಮಟ್ಟು ದಡದಡಿಸುತಂ| 

ಗಾವುದಳವಿಯ ಬಟ್ಟೆಯೊಂದೂರ್ಗೆ ನಡೆತಂದು 

ದೇವಾರ್ಚನೆಯ ನಿತ್ಯನೇಮಕ್ಕೆ ಮನದಂದು | ೬೦ 

ಅತ್ತಲಾ ಕಿನ್ನರಯ್ಯಂ ಹೋಗಿಯಿರಲಿತ್ತ 

ನಿತ್ಯ ನಿಯಮಕ್ಕೆಂದು ಶರಣರಂ ಕೂಡುತ್ತ| 

ಅಂದು ಬಸವಂ ಬಂದು ಶರಣಪಾದೋದಕದಿ 

ಮಿಂದು ಮಡಿವರ್ಗಮಂ ಪೊದೆದು ಮಿಗೆ ಸಂತಸದಿ | 

ಕಿನ್ನರಯ್ಯನನಱಸಿ ಕಾಣದೆ ಭಯಂಗೊಂಡು 

ಎನ್ನೊಡೆಯನೆಲ್ಲಿರ್ದನೆಂದು ನೇಹಂಗೊಂಡು | 

ಬೆಸಗೊಳಲು ಶರಣರೆಂದರು ಬಸವರಾಜಂಗೆ 

ಶಶಿಧರನ ಸದ್ಭಕ್ತಿಯಾಚಾರ*ಧೀರಂ*ಗೆ | 

(*ರಾಜ (ಕ.ಖ.), ಬೀಜ (ಗು);))) 

ಎಲೆ ಬಸವ ಕಿನ್ನರಯ್ಯಂ ತಮ್ಮ ದೇವಂಗೆ 

ಸಲೆ ಸೊಗಸಿನುಳ್ಳಿಯಂ ತರೆ ಮಲ್ಲಿನಾಥಂಗೆ | ೭೦ 

ಕಂಡದಂ ನಿಂದಿಸಿದರೆಂದು ಘನಕೊಪದಿಂ 

ಕೆಂಡವಂ ಮೆಟ್ಟಿದಂತಾಗಿ ಸಂತಾಪದಿಂ | 

ಮುಳಿದು ಪೋದರ್ ಕಿನ್ನರಯ್ಯಂಗಳಂತದಕೆ 

ಕಳೆದು ಹೋಗದ ಮುನ್ನ ಹೋಗಿ ಬೇಳ್ಳು'೨[ದು ಇ]೨'ದಕೆ | 

(೨. ದನಿ (ಕ.), ದನ (೩) ; ) 

ಗುಣವಂತನಭಿಮಾನಿ ಮುಳಿದು ಹೋದ ದೇವ 

ತ್ರಿಣಯನವತಾರ ಶರಣಂ ಪೋದನೆಲೆ ದೇವ | 

ಎಂಬುದಂ ಕೇಳಂಜಿ ಬಸವಣ್ಣ ಮರವಟ್ಟು 

ಹಂಬಲಿಸಿ ಹಲುಬಿ ಘನತಾಪ ಮನಮಂ ನಟ್ಟು | 

ನೊಂದು ಮನಗುಂದಿ ತನು ಕಂದಿ ಮಿಗೆ ಮಿಗೆ *ಕೋ*ಡಿ 

ಬಂದ ಸುಕೃತಂ ತಿರಿಗಿ ಹೋಯ್ತಂದು ನೆಱೆ ಬಾಡಿ | ೮೦ 

(*ನೋ (ಖ.ಕ.)

ಇನ್ನೆಂತು ಮಾಡುವ ಕಿನ್ನರಯ್ಯಂ ಮುಳಿದ- 

ನಿನ್ನೆಂತುಟಪ್ಪುದೋ ಭಕ್ತರೇ ಬಲ್ಲರಿದ-| 

ನೆಂದು ಗಣವೃಂದಕ್ಕೆ ಭಯದಿಂದ ಮೈಯಿಕ್ಕಿ 

ಅಂದು ಬಸವಣ್ಣನುಬ್ಬುಡುಗುತಂ ಮೈಯಿಕ್ಕಿ | 

ಅಱಿದನಱಿದೆಂ ನೋಡು ನುಡಿಕೆಟ್ಟ ನಾಲಗೆಗೆ 

ಮಱೆನುಂಟುಂಟು ಅಪರಾಧವೀ ನಾಲಗೆಗೆ | 

ಬಂದುದೀವುಳ್ಳಿಯಂ ನಿಂದಿಸಿದ '*ದಂಡ*ಕ್ಕೆ 

ಇಂದು ನಾನಪರಾಧಿಯೇ ಶರಣವೃಂದಕ್ಕೆ || 

 (*ಡಂತೆ (ಖ.)) 

ದೇವ ಒಂದಂ ಬೆಸಸಿರೇ ಇದಕ್ಕೆನುತಮಿರೆ 

ದೇವಶರಣರ್ ನುಡಿದರಾ ಒಸವ ನಲಿವುತಿರೆ | ೯೦ 

ಬಸವ ಕೇಳಿಂದಾದ ಸಮೆದ ಬೋನವನಿಂತೆ 

ಎಸೆವಶರಣನ ಕೊಂಡು ಬಂದು ನಾವಿನ್ನಂತೆ | 

ಉಳ್ಳಿಯಿಂ ಕಿನ್ನರಯ್ಯಂಗಾದ ಮುಳಿಸುವಂ 

ಉಳ್ಳಿಯಿಂದವೆ ತೀರ್ಚಿ ಕಳೆದು ನಿರೋಧವಂ | 

ಎನೆ ಬಸವರಾಜಂ ಹಸಾದವೆನುತಂ ನಿಂದು 

ಘನಮಹಿಮನಾಕ್ಷಣಂ ತರಿಸುತಿರ್ದಂ ನಲಿದು | 

ಒಸೆದು ತರುತಿರ್ದರಾ ಲೇಸಪ್ಪ ಉಳ್ಳಿಯಂ 

ಮಸಗಿ ತರುತಿರ್ದರಾ ಶಿವಭಕ್ತರೊಲ್ಮೆಯಿಂ | 

ತೀವಿ ಬಂಡಿಯೊಳು ನಾಲ್ಸೆದೆಸೆಗಳಿ೦ ಬರುತಮಿರೆ 

ಏವೇಳ್ವನಾ ಭಕ್ತರುತ್ಸಹವನೊಪ್ಪುತಿರೆ | ೧೦೦ 

ಕಹಳೆ ಮದ್ದಳೆ ಶಂಖನಾದವುಳ್ಳಿಯ ಮುಂದೆ 

ಬಹುವಿಧದ ವಾದ್ಯ ಸಂತಾನವುಳ್ಳಿಯ ಮುಂದೆ | 

ಹಾಡುವ‌ರ್ ಪರಸುವರ್ ಕುಣಿವರುಳ್ಳಿಯ ಮುಂದೆ 

ಆಡುವರಗ ನೋಡುವ‌ರ್ ನಲಿವರುಳ್ಳಿಯ ಮುಂದೆ | 

ಬಿತ್ತರಿಪ ವೃಷಭಧ್ವಜಂಗಳುಳ್ಳಿಯ ಮುಂದೆ 

ಒತ್ತರಿಪ ಶರಣರ ಸಮೂಹವುಳ್ಳಿಯ ಮುಂದೆ | 

ಇಂತು ಬರಲುಳ್ಳಿಯಂ ಬಸವಣ್ಣನಿದಿರ್ಗೊಂಡು 

ಸಂತಸದೊಳಂದು ವಿಸ್ತರಿಸಿದಂ ಕೈಕೊಂಡು | 

ಆನೆಗೆ ಗುಳಂ ಕುದುರೆವಕ್ಕರಿಕೆಯುಳ್ಳಿಯಿಂ 

ನಾನಾಭರಣವೆಸೆವಲಂಕರಣವುಳ್ಳಿಯಿಂ | ೧೧೦ 

ತೊಡುವುಡುವ ಪೊದೆವ ಸುತ್ತುವವೆಲ್ಲವುಳ್ಳಿಯಿಂ 

ಪಿಡಿದಿಡುವ ನುಡಿವ ಮಾಡುವವೆಲ್ಲವುಳ್ಳಿಯಿಂ| 

ಇಂತು ಪಟ್ಟಣವೆಲ್ಲವುಳ್ಳಿಗಳ ಮಯವಾಗೆ 

ಸಂತಸಂ ಮಾಡಿ ಬಸವಣ್ಣನುನ್ನತವಾಗೆ | 

ಅವರಿದಿರ್ ಗಾವುದರೆದಾರಿಯೊಳಗಂದುಕ್ಕಿ 

ತವಕದಿಂದೊಪ್ಪವುಳ್ಳಿಯ ಚಪ್ಪರವನಿಕ್ಕಿ | 

ಲಕ್ಕಲಕ್ಕಕ್ಕೆ ನೆರೆದ ಭವಭಕ್ತರ ನಡುವೆ 

ಉಕ್ಕಂದದುರವಣೆಯ ವೀರಶರಣರ ನಡುವೆ | 

ನೆರೆದು ನೆಗಹಿದ ಕೋಟಿವೃಷಭಧ್ವಜದ ನಡುವೆ 

ಬರುತಿರ್ದನಾ ಬಸವನೆಸೆವ ಸಿಂಧದ ನಡುವೆ | ೧೨೦ 

ಉಳ್ಳಿಗಳ ಜಂಪಂ ಶಿರೋಮಾಲೆಗಳನಿಕ್ಕಿ 

ಉಳ್ಳಿಗಳ ಬಾಹುಬಳೆ ಕಂಠಮಾಲೆಯನಿಕ್ಕಿ | 

ಉಳ್ಳಿಗಳ ಮುಡಿದು ಉಳ್ಳಿಗಳ ಕೈಯೊಳ್ ಪಿಡಿದು 

ಒಳ್ಳಿತೆಸಿಸುವ ಮನದ ಬಸವರಾಜಂ ನಡೆದು | 

ಬರುತಮಿರೆ ಬೆಳ್ಳೂಡೆಗಳಲ್ಲಿ ದಿವಿ ಮುಸುಕಿದವು 

ನೆರೆದು ಬಹುವಿಧವಾದ್ಯವಡಸಿ ನಿಖೆ ಮೊಳಗಿದವು | 

ಧಿಮಿಧಿಮಿಕು ದುಮುಕುತಂಗೆಂಬ ಮದ್ದಳೆಯ 

ಚಮಕ ತಕನಕ ತಕನವೆಂಬ ಕಹಳೆಯ ದನಿಯ | 

ನಟಟಿಹಕು ಫಣಭಣ ಛ್ಚಿಳಿಲೆಂಬ ಆವುಜೆಯ 

ನಟವಿಕಟ ಕಟಕ ಬಿಱ್ಬೆಂಬ ಕರಡೆಯ ದನಿಯ | ೧೩೦ 

ನಡುವೆ ಕೇಳಿಸುವ ಹೇಳಿಕೆಯವರ ಸಂಗಡದ 

ಗಡಣ ವಿಡಿದೊಪ್ಪದಿಂ ಬರುತಿರ್ದ ಜಂಗಮದ |

ಕೋಳಾಹಳದ ಸರ್ವಸಂಭ್ರಮಂ ನೆಗಳುತಿರೆ 

ಮೇಳೈಪ ಪೌರಜನವರ್ತಿಯಿಂ ಬರುತಮಿರೆ| 

ಎಡಬಲದ ವೀರತತಿ ನೆಲನನುಗ್ಘಡಿಸುತಿರೆ 

ಬಿಡದೆ ಪರಸಮಯಿಗಳು ನಡನಡುಗಿ ಸರಿವತಿರೆ |

ಭಕ್ತಜನಚರಣಸರಸಿರುಹಷಟ್ಟದನೆಂಬ 

ಭಕ್ತಜನಕುಮುದವನಕಮನೀಯಶಶಿಯೆಂಬ | 

ಜಂಗಮದ ವೇಳೆ ಜಂಗಮದ ಕಿಂಕರನೆಂಬ 

ಜಂಗಮಪ್ರಾಣ ಜಂಗಮದ ಸಂಪದನೆಂಬ | ೧೪೦ 

ಬಿರುದೆ ಕಹಳೆಗಳು ದೆಸೆದೆಸೆಗೆ ಕರೆವುತಿರೆ 

ಧರೆ ನಡುಗೆ ನಿಸ್ಸಾಳನಾದವುತ್ತಮಿರೆ | 

ನಡೆದು ಬಂದುದು ರಜತಗಿರಿಯ ಹಾದಿಯ ತೆಱದಿ 

ನಡೆತಂದುದಿಂದುಮೌಳಿಯ ನಿಬ್ಬಣದ ತೆಱದಿ |

ಇಂತು ಬರುತಿರೆ ಕಂಡು ಕಿನ್ನರಯ್ಯಂ ನಿಂದು 

ಚಿಂತಿಸಿದನೆಲ್ಲಿಯದಿದೇನು ಕೌತುಕವೆಂದು | 

ತನ್ನ ಮುನಿಸಂ ತಿಳುಪಲೆಂದು ಬಸವಂ ಬಪ್ಪ 

ಉನ್ನತಿಯಿದೆಂದರಿದು ತನ್ನ ಮನದೊಳಗಿಪ್ಪ | 

ಮುನಿಸು ದೇಹದೊಳಿದಿರ್ಗೊಂಡುದಾ ಭಕ್ತಂಗೆ 

ನೆನಹು ಬಸವನ ಮೇಲೆ ಬಿದ್ದು ದಾ ಭಕ್ತಂಗೆ | ೧೫೦

ಚಿತ್ತಂ ಬಸವನತ್ತ ತಿರಿಗಿತ್ತು ಭಕ್ತನಂ 

ಒತ್ತರಿಸಿ ಪುಳಕಂಗಳೆತ್ತಿದವ 'ಶರಣನಂ | 

ಇದಿರೆದ್ದು ಬರಿಸಿದವು ಕರಣಂಗಳಾತನಂ 

ಸದಮಳ ಶಿವಧ್ಯಾನಪರಿಪೂರ್ಣ ಹೃದಯನಂ। 

ಇಂತು ಸಾತ್ಕ್ರವಿಕರಸದರಸನಾಗಿ ಬರುತಿರ್ಪ 

ಕಂತುನದಹರನ ಸುಖದವತಾರನೆನಿಸಿರ್ಪ |

ಕಿನ್ನರಯ್ಯನನಕ್ಕಱಿಂದೆ ನೋಡುತೆ ಬಂದು 

ಎನ್ನ ಸಂಗಮನೀತನೀತನೆನುತೈ ತಂದು | 

ಇಳಿಸಿದಂ ಸರ್ವಾಂಗಮಂ ಕಿನ್ನರನ ಪದಕೆ 

ಗಳಗಳನೆ ಸುರಿದನಾನಂದಜಳವಂ ತಳಕೆ | ೧೬೦

ಎತ್ತಿದಂ ಕಿನ್ನರಯ್ಯ ಬಸವರಾಜನಂ 

ಉತ್ತಮೋತ್ತಮಭಕ್ತಿಯಾಚಾರ್ *ತೇ*ಜನಂ | 

ತೆಗೆದು ತಕ್ಕೈಸುತಂ ತಣಿಯದೋರೊರ್ವರೊಳು 

ಬಿಗಿಬಿಗಿದು ಪುಗಲೆಳಸುತಿರ್ದ'ರೋರೊರ್ವರೊಳು | 

ಆಲಿಕಲ್ಲಾಲಿಕಲ್ಲಂ ತಾಗಿದಂತಾಗೆ 

ಹಾಲೊಳಗೆ ಹಾಲಂ ಕರಂ ಬೆರಸಿದಂತಾಗೆ | 

ಬೆಳಗು ಥಳಥಳಿಸ ಬೆಳಗಂ ಕೂಡಿದಂತಾಗೆ 

ತಿಳಿದಮೃತವಮೃತವಂ ಬಿಡದಪ್ಪಿದಂತಾಗೆ |

ಅಪ್ಪಿಕೊಂಡಿರ್ದರಿನಿತುಂ ಬೇಗವಿರ್ಬರುಂ 

ಒಪ್ಪಂಬಡೆದರಭವನಾಜ್ಞೆಯೊಳಗಿರ್ಬರುಂ | ೧೭೦

ಆಗ*ಳುಣ್ಮಿ*ದವು ದುಂದುಭಿಶಂಖಕಹಳೆಗಳು 

ಚಾಗು ಬೊಲ್ಲೆನುತೆ ನೆಗೆದವು ಭಕ್ತಹರಕೆಗಳು | 

( *ಳೂಳಿ*) 

ಭೋರೆಂದು ಕೊಂಡಾಡಿದರ್ ಬಸವರಾಜನಂ 

ಹಾರೈಸಿ ಕೊಂಡಾಡಿದರ್ ಕಿನ್ನರಯ್ಯನಂ | 

ಒಡಗೊಂಡು ಬಸವರಾಜನ ಮಹಮನೆಗೆ ಬರುತ್ತೆ 

ಗುಡಿಗಟ್ಟಿದುಳ್ಳಿ ಗಳ ಗುಡಿಯಂ ನಿರೀಕ್ಷಿಸುತೆ |

ಹಾಡುವ ಗಣಂಗಳಂ ಹರುಷದಿಂ ನೋಡುತಂ 

ಆಡುವ ಗಣಂಗಳಂ ಗುರ್ಬಿನಿಂ ನೋಡುತಂ | 

ಬಂದು ಬಸವಣ್ಣನರಮನೆಯ ನಲವಿಂ ಪೊಕ್ಕು 

ಸಂದಣಿನ ಕೋಟೆಗ*ಣ*ಸಂಚಯಕೆ ಕೈಯಿಕ್ಕು | ೧೮೦

(*ಳ*) 

ಇರೆ ಸವೆದವಲ್ಲಿ ಉಳ್ಳಿಗಳ ಮೇಲೋಗರಂ 

ಸರಸವೆನಿಪುಳ್ಳಿಗಳ ಪಕ್ವಾನ್ನದಾಗರಂ | 

ಮಲ್ಲಿಗೆಯ ಬಣ್ಣ ಮಂ ಚಂದ್ರಿಕೆಯ ಸವಿಗಳಂ 

ಅಲ್ಲಿಯಂಕುರಿಪ ತಾರಾಗಣದ ರುಚಿಗಳಂ |

ಕವರ್ದುಕೊಂಡಂತೆ ನೆಱೆ ಥಳಥಳಿಸುವುಳ್ಳಿಯಂ 

ಶಿವಭಕ್ತ ಕಿನ್ನರಯ್ಯನ ಸವಿಯ ಉಳ್ಳಿಯಂ | 

ಸಕಳ ಪಕ್ವಾನ್ನದೋಗರತತಿಗಳು ಸವೆಯೆ 

ಸಕಳ ಶರಣರ ಶಿವಾರ್ಚನೆ ಸೌಖ್ಯಮಂ ಪಡೆಯೆ |

ಆರೈಸಲಿಕ್ಕುತಂ ಸಕಳಶಿವಲಿಂಗಕ್ಕೆ 

ಹಾರೈಸಿ ಪೊಡಮಡುತೆ ಪರಮಪ್ರಕಾಶಕ್ಕೆ |  ೧೯೦

ಕೈಕೊಂಡರಲ್ಲಿ ಸತ್ಯಪ್ರಸಾದನಂ 

ಮೈ ಕೊನರೆ ತಾಳಿದರ್ ಸುಕೃತಪ್ರಸಾದಮಂ | 

ಉಳ್ಳಿಯಂ ಕಚ್ಚಿ ಸರಿದಾಡುತಿಪ್ಪರ್ ಕೆಲರು 

ಉಳ್ಳಿಯಂ ಕಿನ್ನರನುಮಂ ಪರಸುವರ್ ಪಲರು | 

ಇಂತು ನಲವಿಂ ಪ್ರಸಾದಂಗಳಂ ಕೈಕೊಂಡು 

ಸಂತತಂ ಪರಸಿದರು ಬಸವನಂ ನೆಲೆಗೊಂಡು | 

ಅಮಮ ಶರಣರ ಬಂಧು ಶರಣರೊಲುಮೆಯ ಬಸವ 

ಅಮಮ ಶರಣೈಕಚಿಂತಾಮಣಿಯೆ ಎಲೆ ಬಸವ | -

ಅರರೆ ಶರಣರ ಮುಖದ ರತ್ನ ದರ್ಪಣ ಬಸವ 

ಅರರೆ ಶರಣರ ಮನೆಯ ಪರುಷಪುರುಷನೆ ಬಸವ |  ೨೦೦

ಬಸವಯ್ಯ ಬಸವಣ್ಣ ದಂಡನಾಥನೆ ಬಸವ 

ಬಸವ ಗಣವಿಸರದೊಳಗೆಸೆದ ಸಂಗನಬಸವ | 

ಎಂದು ಕೀರ್ತಿಸುವ ಶರಣಸ್ತುತಿಗೆ ನಡನಡುಗಿ 

ಒಂದುವಂ ಹೊಗಳದಿರಿ ಎಂದು ಚರಣದೊಳೆಱಗಿ |

ನುಡಿದನಾ ಬಸವಣ್ಣನರರೆ ಶರಣರ ಮುಂತೆ 

ಬಿಡದೆ ಮಾಡುವೆನಿಂದು ಮಾಡಿದ ತೆಱದೊಳಿಂತೆ | 

ಅತಿಶಯದೊಳೊಪ್ಪುವುಳ್ಳಿಯ ಪರ್ಬಂ ಕರಂ 

ಪ್ರತಿಸಂವತ್ಸರಂ ಮಾಡುತಿರ್ಪೆನಿಂತಿದು ಭರಂ | 

ನೇಮವೆನಗೆಂದು ನೆಱೆ ಬಸವರಾಜಂ ನುಡಿದು 

ಸೋಮಧರನೆನಿಪ ಕಿನ್ನರನ ಕರುಣಂಬಡೆದು |೨೧೦

ಕಿನ್ನರನ ಮುನಿಸನಾ ಪರ್ಬದಿಂದಂ ತಿಳಿಸಿ 

ಮನ್ನಿ ಸುತಲವರ ಪದದೊಳು ಚಿತ್ತಂ ನಿಲುಷಿ | 

ಭಕ್ತಜನವನಧಿವರ್ಧನಸುಧಾಕರನೆನಿಪ 

ಭಕ್ತ ಜನವನಜವಿಕಸಿತತರಣಿಯೆಂದೆನಿಪ | 

ಪರಸಮಯತಿಮಿರಕಮನೀಯಭಾಸ್ಕರನೆನಿಪ 

ಪರಸಮಯಸುಮನಕೋದಂಡಪುರಹರನೆನಿಪ | 

ಮಝರೆ ಶರಣರ ನಡುವೆ ಬಸವಣ್ಣನೊಪ್ಪಿದಂ 

ಮಝ ಬಾಪು ಬಾವು ಸಂಗನ ಬಸವನೊಪ್ಪಿದಂ || ೨೧೮